今日nowTV首席副總裁總經理(製作部)何麗全現身灣仔，出席仁愛堂活動，除咗回應番噚日now財經台嘅「毋忘六四」民調風波之外，亦被問及有傳言話nowTV喺免費電視發牌戰上已然出局。不過何麗全似乎定過抬油，佢話:「我知我哋公司有個小組去處理，我諗佢哋有個研究做緊，呢啲傳言嚟啫(不獲發牌)。」問到可覺得唔公平？何麗全就表示﹕「唔會﹗我又唔相信呢樣嘢。我哋籌備得最好，已經有免費頻道做緊俾觀眾，同埋我哋喺手機程式已經有免費節目俾觀眾睇，而且我哋成日都強調，我哋嘅財政係最穩健嘅，成日都強調呢樣嘢。」

至於王維基嘅香港電視依家發動互聯網攻勢，何麗全表示一直有留意﹕「梗係有啦，要知己知彼嘛。我睇過智叔嗰套(《警界線》)，因為睇得太少，而且坦白講，始終喺手機睇，睇得唔係咁……我都覺得可以做一次類似節目巡禮，俾觀眾睇多啲，喺螢幕度睇到。依家睇得太少，但sofar我覺得OK嘅。」何麗全又話因為旗下梅小青、劉家豪搵林峯拍新劇，所以無綫會有優先播映權，不過仲未傾，問到林峯身價係咪五十萬一集？何麗全話總之係合理。

查實王維基唔係第一次動員全台力量舉行「另類」節目巡禮，依家用YouTube播劇集花絮點擊率都唔錯，今晚9：30仲有劉浩龍、尹子維、趙學而同陳霽平演出嘅《第二人生》第一集六分鐘片段播。可以去呢度睇﹕

http://www.youtube.com/user/HKTVNetwork?feature=watch