【新增動新聞】
正所謂民生無小事，一眾建制派喺大事上面，例如用權力及特權法查沙中綫就冇晒影，咁喺小事上面希望做到啲嘢啦！上個月尾將軍澳尚德商場因為百佳超市結業，一眾建制派區議員、工聯會西貢區議員簡兆祺同民建聯莊元苳就走去示威，最後紅頭巾包頭，以「絕食10小時」成功爭取9月開始設立臨時街市，為小市民爭取咗唔少方便。不過泛民嘅地區小隊一直都同領展有聯絡，究竟係邊個功勞先？領展回覆《蘋果》就話，佢哋只係承諾會盡快設立臨時超市，冇話幾耐先有，不過建制區議員呢10個鐘嘅馬拉松式絕食都好值得。

事緣領展轄下嘅尚德商場因為大翻新，位於3樓嘅百佳同幾間診所將不獲續租，由於超市幾乎成為小市民嘅日常必去之地，所以泛民同建制都希望幫居民爭取保留呢個超市，結果建制派喺上個月尾喺Post展示「成功爭取」成果，喺佢哋絕食10小時嘅堅持下，領展承諾9月就會設立臨時超市，不過泛民小隊嘅「將軍澳民生關注組」就話，其實佢哋早喺8月28號就已經就事件同領展傾，仲話商場嘅告示講明出年1月先會有臨時超市，證明建制派喺度講大話。

領展發言人回覆《蘋果》就話，為咗配合商場優化工程，尚德廣場計劃重整零售樓面，位於3樓嘅超市將於9月中下旬停業。為便利居民，正同超市租戶洽商喺超市停業期間安排臨時位置，為居民提供一般超市主要日常生活用品。不過佢哋就冇畀到確實日子，只係話盡快同各方傾下，希望便利到居民咁話。

其實大家都係為居民做實事，建制派仲絕食10個鐘咁激進，其實都好努力架嘞！

網民點睇

Seven Chan：10個鐘就可以叫絕食甘香港有飢荒lu.........
Andrew De Saruru Chan：饑饉30 直頭非人道添啦
Eric Ching：抽血驗身都要10個鐘啦