ViuTV真人騷《全民造星III》10強剛出爐，陳葦璇、Cloud（雲浩影）、NY（鍾諾言）、KLAU（劉瑞祈）、CY（陳澤言）、Alina（李靜蓮）、Mischa（葉巧琳）、Ben（趙祥誠）、Kimman（黃劍文）與ANSONBEAN （陳毅燊）成功打入總決賽，本周六（26日）Boxing Day於九展Star Hall一較高下，決賽賽果會由全民投票及星級專業評判團評分，各佔一半分數來決定，嘉賓評判今年有毛舜筠、鄧麗欣。

《蘋果》約齊10強參賽者接受訪問，Mischa、Kimman與葦璇更以清唱拉票，個個狀態大勇，準備就緒，希望在總決賽中痛快地用精采的表演來回饋觀眾。《蘋果》先跟眾人熱身，要他們各自選出心目中的冠軍，結果由拿手折骨舞的阿Ben「當選」，看來阿Ben在《造星》中人緣相當好，被問到是否有奪得「友誼先生」的感覺？他即怕醜仔上身：「點解嘅？真係估唔到。其實我都有諗過比賽時贏嘅，但冇諗過係真，我一直都平常心。」

Kimman也得兩票，他感性說：「我哋大家都會有夢想，有時會擺低咗甚至想過放棄，但喺度又重拾返，係彼此感染嘅。我覺得每一位身上都有發光嘅地方，唔好放棄，雖然呢幾個月好辛苦，甚至係折磨，但我好enjoy，成功嘅藝人係需要呢種折磨，好欣賞每位，我心目中大家都係冠軍。」

比賽經歷了多個月，除了為追夢而奮鬥，參賽者們也建立起珍貴的友誼，訪問期間見他們打成一片，Alina說：「我好proud of自己行到而家，對我係好大挑戰，我對唱歌有壓力，喺大家身上，我學識欣賞自己，驚嘅嘢原來唔需要驚，有低處先可以走得更高，我冇當呢個係比賽，我當呢個係我人生歷程，enjoy舞台。」Cloud則說：「Casting時覺得自己能力不足，一路上我喺大家身上學到好多嘢，包括別人嘅想法同態度，喺呢個比賽學到其他地方學唔到嘅嘢。」

為考驗他們之間的友誼，他們又各自抽出一位對手品評，不過結果都是讚多過彈。ANSONBEAN抽中Cloud，他說：「Cloud大頭蝦得嚟，喺台上會好吸引人，我見佢最近表現開始穩陣，我想佢有返大頭蝦，撞啲冇預計但好睇嘅嘢出嚟。」而Cloud則抽中CY，她說：「CY表演好出眾，台風同健體操，好令人印象深刻，我唔想佢冇咗神經刀嘅性格。」

Alina抽中的是大熱ANSONBEAN，Alina說：「我決賽嘅表演會再比之前嘅昇華，戴定綠帽（其實想講頭盔）先。」全場爆笑。她繼說：「ANSONBEAN魅力沒法擋，佢企出嚟乜都唔做已經贏咗，佢嗰種魅力係與生俱來，所以我覺得可以利用只有你先有嘅優點。」

KLAU抽中的是Kimman，KLAU說：「我覺得Kimman係最能夠代表到《全民造星》嘅，因為睇到佢第一round，一個田園鄉郊歌手去到而家擁有不浪漫罪名嘅形象，我覺得佢喺4個月入面脫胎換骨，要改進嘅嘢就係希望佢講嘢嘅語速可以快少少。」NY抽中了Alina，他說：「我覺得Alina行出嚟嘅台風已經好足夠，佢嘅自信我都要學一學。需要改進嘅係，佢做自己熟悉嘅嘢好有自信，但仲喺嘗試緊嘅時候，可以攞返嗰種自信出嚟。」

採訪：卓寶花

攝影：仇志德

攝錄：林賓尼、廖達燊

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！