由孔劉、金高恩、李棟旭、劉仁娜主演嘅tvN人氣韓劇《鬼怪》已於大前晚大結局，第16集收視更升至20.5%，打破《回答吧！1988》嘅18.803%收視紀錄，成為tvN開台以嚟最高收視電視劇，同時成為今年初嘅「國民電視劇」。編劇金恩淑就未有停手，更準備開拍古裝劇。

金恩淑預計於明年上半年再推新劇，佢今次於《鬼怪》中嘗試貫穿古代跟現代嘅手法，效果非常不錯。而佢完成《鬼怪》劇本後就表示：「又想寫啦。」不過金恩淑表示要先休息三個月充電，之後先開始動筆。

至於《鬼怪》男主角孔劉就冇得休息三個月充電，因為佢早前趕拍劇集而已經四個月冇拍廣告，加上《鬼怪》熱潮令佢多咗好多新廣告約，孔劉之後要忙於還廣告債，其所屬事務所更透過：「孔劉需要進行兩個月嘅密集拍攝。」而其實孔劉於大前日凌晨都仲拍攝緊《鬼怪》，劇集一煞科，佢前日已開始拍廣告，keep住好忙。

另外，金高恩噚日於Instagram公開跟「三神奶奶」李伊及劉仁娜於煞科宴嘅合照，留言：「我愛你們。」孔劉亦於煞科宴上被集郵。