今朝（30日）分別進行周三（5月2日）晚沙田泥地賽事排位兼最後試跑，積極做快工夫之馬房，計有葉楚航、苗禮德、蔡約翰、沈集成、霍利時及呂健威，而手風大順之潘頓亦如常到場落力操馬。

《蘋果》晨操專家積奇睇完晨操後，對第四場「估惑」及第五場「頌友」有高度評價，詳情如下：

列陣第四場二班泥地1650米的「估惑」今日（30日）由蔡約翰馬助手跳一段，沿欄按實順走，馬身靚，毛色深潤有光澤，大步檻過好輕鬆，神情專注，當打之馬，狀態長期見好，今次騎師是杜利萊。

角逐第五場四班泥地1200米的「頌友」由霍利時馬房騎馬人跳一段，戴頭罩走中檔，輕易造快時間，馬身喼得靚，跨步開揚有力，拼後有正常操練，老馬體力甚強，配搭為受讓十磅見習騎師黃俊。