平胸女買胸圍，不幸遇上較「Prada惡魔」更尖酸刻薄的無禮售貨員，被嘲笑身材差之餘，又買不到合心水胸圍，被氣得七孔生煙！zita在BeautyExchange留言，稱日前到姊妹介紹的銅鑼灣內衣店買胸圍，售貨員讓她試了數款貨品。她說可能自己骨架不標準，難以買到舒服的bra，總是感到胸前很緊，這次也不例外，試了多款也不合適，售貨員便開始不耐煩，「我試來試去唔啱身，佢開始嚟料，喺度話我個胸無肉，好弱，好似細胸係罪咁！」
為免被人誤以為「混吉」，zita向售貨員解釋以前買過太緊的bra導致胃痛，「跟住佢好粗魯咁用手指喺我個胸同個bra之間插來插去，話『𠵱家已經好鬆，好多客喺呢個情況（插得入手指）好鬆㗎嘞，係得你話緊㗎咋！』」身為顧客竟要受氣。

被揶揄胃痛應睇醫生

zita指對方愈來愈離譜，「仲用罵人嘅語氣話，如果我胃痛，係我個胃唔好，唔關個bra事，個胃有事應該去睇醫生。」
售貨員「閱胸」無數，三番四次聲言「冇理由用個胃去就個bra」，可憐zita有寃無路訴，「真係慘，唔通我真係戴到胃出血咁先至啱？」買bra學問博大精深，姊妹勸她千祈要試穿，有人建議她不要用有鐵線承托的胸圍，但zita有苦自己知，「我一定要用，否則會扁晒。」