港視鐵定下周三（19日）開台，當日中午將於金鐘萬豪酒店舉行開幕酒會，筵開36席，除有60多位藝人參與外，還會邀請約500位廣告客戶等賓客出席盛典。港視前藝人梁健平日前率領周家怡、黃美棋、岑潔儀和何詠雯到荃灣一間婚紗公司揀衫，梁健平說：「我主演嘅《三輪車伕》得獎後，獲婚紗公司邀做代言人，知道開台日要着靚啲，咪搵埋咁多位靚女一齊揀衫，希望開台大吉。」

周家怡表示心情既緊張又興奮，她鍾意黑晚高貴晚裝；年紀最輕的美棋BB則喜歡鮮艷顏色，還專挑谷胸短身晚裝裙，似乎對身材甚有信心。據悉美棋當日將與陳錦鴻等演短劇，簡介港視誕生。美棋BB曾演出過四部港視劇，當中最喜歡《我阿媽係黑玫瑰》，她說：「劇中我做小女俠，角色好鍾意，希望騰訊會揀呢套做首播劇。」懷孕7個月的岑潔儀肥了20磅，揀衫最困難，但自覺BB帶來幸運，她笑說：「明年1月預產期，懷孕後公司就開始順利，開台心情同生仔一樣咁興奮。」

《選戰》成為開台劇，有份演出的梁健平說：「開台簡直係千呼萬喚！」問怕不怕題材敏感？他開玩笑說：「我本身皮膚都好敏感啦，敏感得過發唔到牌？到時（午宴）我會幫手迎賓。」早前確診患上第四期腸癌的鄺佐輝，已於今年5月約滿港視，問會否出席開台午宴為港視打氣？他透過短訊回覆：「當然會（打氣），觀眾多個選擇絕對是好事！我不介意，但病樣。」他表示每三星期做一次化療，已做了八次，至明年3月中完成療程。