狼振英上任特首冇耐，狼班子已經淪為豆腐渣，民望同誠信拜拜，難怪阿爺要諗PlanB。最近有傳阿爺已經決定「百日定生死」，若然狼班子民望喺未來三個月冇任何起息，PlanB會即時啟動，屆時大限已到嘅大話王狼振英，隨時被叮走。

政、商界盛傳，阿爺會喺未來百日，就狼振英生死做決定。有商界人士透露，「百日定生死」說法合理，因為三個月之後，立法會選完、狼振英首份施政報告亦已出爐；若果狼振英民望仲係冇得升，真係醫番都嘥藥費，到時中共十八大人事安排怕且搞完，阿爺應該有時間搞PlanB。
雖然政務司司長林鄭月娥仲係最多人支持嘅替補特首，但據聞阿爺對佢唔算信心十足，擔心未必可靠；反而立法會主席曾鈺成一早喺「候選名單」，信任度毋庸置疑，因此曾主席嘅替補賠率又再熱番，僅次於林鄭。
一旦選定最終替補接班人，據聞阿爺唔會遲過2014年之前換馬，因為北京好擔心若果太遲換馬，呢位替補特首就唔夠時間爭民望，為阿爺喺2017年普選特首呢場硬仗上作戰咯。
mailto:[email protected]