韓國演藝圈近日爆出性醜聞，如韓片《與神同行》男星吳達洙、韓版《步步驚心》男星趙敏基、已婚男星曹在顯等均被爆涉性騷擾。噚晚再有人在網上留言，實名公開曾遭韓劇《有品位的她》39歲男星韓在英以及話劇團團長性騷擾。

據受害人A某嘅發文，佢喺2010年23歲時加入相關話劇團，因為年紀最細要負責煮埋嘢食，點知2011年嘅某一日，突然被團長錫咗塊面一啖，A某又指曾被團長強行拉到汽車旅館，團長沖完涼更叫A某瞓上床，不過A某強烈拒絕並離開。A某之後喺一次飯聚中向劇團嘅前輩哭訴，點知同屬劇團前輩嘅韓在英就言語間性騷擾A某，稱「我都想同你上床，團長都係男人嘛」，令A某大感衝擊。

A某續指：「之後遭韓在英拉到酒館單獨飲酒，飲完酒韓在英想拉我去汽車旅館，我拒絕並返劇團休息，點知韓在英跟住我返劇團，然後對我性騷擾，我反抗後離開。」

對於性騷擾指控，韓在英今日公開向A某道歉，表示：「無論出於咩原因，對對方造成傷害，我深感抱歉，今後會喺反省中努力做人。」韓在英又指今早已聯絡對方，並透過電話向對方道歉，亦已經得到A某嘅原諒。

更多韓流，喺晒《娛果》
http://fb.com/appledailyent