何韻詩於科學園舉行《On The Pulse Of 我們正在》音樂節，昨日自己打頭陣演出，不過其中來自台灣的閃靈樂團卻遲遲未獲批工作簽證，閃靈樂團過往訪問中講過自己係「台獨樂團」，而主音林昶佐(Freddy)曾參加不少社運及台灣獨立議題。

阿詩今午回應《蘋果》指：「呢件事件好荒謬，因為呢個只係一個純藝術嘅音樂節，冇任何政治色彩成份，點解一個純藝術嘅一件事，會因為樂團其中一個人嘅政治立場，而成個團都唔批呢？」

何韻詩今午開facebook live，未有再提是次簽證風波，集中介紹音樂會市集部分pop-up store，大致分為手作區、美食區、表演區等，其中有一間係賣何韻詩嘅二手物品、獎項，佢解釋：「你知喇！我o依家係視錢財如糞土，對於獎項，我覺得係唔需要留戀，所有呢度賣出嘅嘢都會捐去我個慈善基金。」為咗唔好阻塞通道，何韻詩喺開live期間，不時提fans唔好圍埋去。