美國高中生拿美路波爾（LaMelo Ball）喺一場比賽裡面自己射入92分當然係好難得，不過，類似嘅情況係美國體壇原來唔可以話係好罕有。根據統計，美國高中籃壇由1913年開始，有19個男生，同埋六個女生曾經喺一場波之內射入超過100分。

可能你會覺得高中籃壇水準比較參差，但係單場射入過百分嘅情況，喺美國大學水平嘅籃球比賽都出現過，近幾年曾經成為話題人物嘅積克泰萊（Jack Taylor）更加試過兩次射入超過100分。第一次係2012年11月20日，JT代表 Grinnell College 對 Faith Baptist，佢就試過射入138分，幫球隊贏179:104。JT呢場波起手108次入52球，當中71次係射三分波，入咗27球，再加射十中七嘅罰球，完全係佢一個人玩晒。

積克泰萊喺差唔多一年後，實情係射入138分呢日一周年嘅兩日前，佢又搵另一隊波 Crossroads College 祭旗。今次JT就輕手咗，只係入咗109分。佢今場波命中率高好多，70次起手入35球，當中48次出手射三分，入咗24球，咁啱都係五成，另外罰球在射17球入15球，幫球隊贏173:123。最得意嘅係，呢兩次得分大暴走都係11月發生，唔通JT係呢個月打波特別叻嘅？不過講開又講，正所謂小時了了，大未必佳，JT喺2015年參加過NBA選秀，但係就無畀人揀中。

↓得分大暴走　JT轟138分破NCAA紀錄↓
http://bit.ly/2lpHl0C