2015/16球季率領李斯特城童話式稱霸英超嘅雲尼亞里，自從2月尾慘食「無情雞」後，唔經唔覺已經賦閒咗3個幾月啦，早前見佢頻頻睇英超，亦有傳水晶宮想搵佢代替走去「嘆世界」嘅艾拿迪斯掌帥，但據法國傳媒報道，去季法甲第7嘅南特有教練沙治奧干斯卡奧離隊後，周日已經同雲尼亞里會面商討個人條款，可望走馬上任。

不過，雲尼亞里仲有一個難關要過，竟然同「年齡歧視」有關？原來法國職業聯賽賽會（LFP）有規例寫明，球隊唔可以聘請退休年齡65歲或以上教練掌帥，而雲尼亞里舊年10月已經過咗65歲生日啦！法國傳媒《20 minutes》就表示，南特方面有信心獲「開綠燈」，令佢哋成為雲尼亞里執教生涯第16支球隊。