韓國女團miss A嘅22歲成員秀智，於2012年拍攝韓片《初戀築跡101》時因清純形象吸引韓國網民，更取代女星孫藝珍獲封為新一代「國民初戀」。雖然近年秀智打扮越趨成熟，似乎想改變「國民初戀」嘅形象，甚至之前有部分網民認為女團Red Velvet成員Joy憑韓劇《她愛上了我的謊》嘅形象能夠接秀智捧成為新一代「國民初戀」，不過據日前網上進行嘅投票，秀智依然以大比數成為網民心目中「初戀」嘅形象，繼續成為「國民初戀」。

有投票網站「panelnow」以「認為誰是初戀Icon？」為題，於本月13號至17號以網站嘅15,734名會員為對象進行投票，結果秀智以38%支持率成為冠軍，網站方面指秀智已經係連續第5年成為是次投票嘅冠軍，名副其實嘅「國民初戀」Icon；其次就係憑《假如愛有天意》、《腦海中的橡皮擦》等韓片展現出清純形象，獲封為「第一代國民初戀」嘅35歲女星孫藝珍，而韓劇《明成皇后》李美妍、韓劇《舉重妖精金福珠》慶收真、韓劇《獄中花》朴珠美等人亦榜上有名。

另外，正服兵役嘅秀智男友李敏鎬，當兵前為MBC電視台拍攝《DMZ,THE WILD》紀錄片，紀錄片於噚日播出「自然的守衛者」篇，正介紹南北韓DMZ（南北韓非軍事區）嘅野生動物，李敏鎬獲粉絲大讚講解得生動有趣。