上個月被《蘋果》獨家影到陳展鵬同落選港姐單文柔喺山頂約會，仲摸黑食包（新聞連結： http://bit.ly/2nKV1DR ）。翌日陳展鵬出發到北京拍劇，臨上機前喺機場冇認同單文柔拍拖，雖然陳展鵬對外否認戀情，不過有指佢已經向無綫承認戀情，仲拍心口話一力承擔（新聞連結： http://bit.ly/2ppzUIJ ）。

據知單文柔生日將至，噚日同屋企人慶祝生日切蛋糕，仲更新埋ig。到咗今日，男主角陳展鵬終於喺大陸開完工，中午就搭飛機返香港。《蘋果》見到佢時一身黑衫黑褲，一手抱住幅畫，一手推行李離開機場，陳展鵬見到記者一啲都唔驚訝，仲幫fans簽名大打親民牌。記者問到佢喺大陸工作順唔順利、單文柔生日將至，有冇約對方慶祝、今晚有冇約出嚟見面，陳展鵬都只係笑而不語。之後司機嚟到幫手推行李，而陳展鵬臨上前都有同記者講拜拜。