米芝蓮三星名廚Umberto Bombana今晚喺中環旗艦餐廳接受意大利總統親自簽發，由意大利駐港澳總領事Antonello De Riu頒授意大利騎士勳章。Bombana主廚請咗杜汶澤、盧覓雪、澳門前行政長官何厚鏵個女何芓諄、前特首董建華外甥金昌民、東亞主席李國寶等到場，分享喜悅，一齊慶祝。

杜汶澤到場即捉住Bombana主廚影相，忽然變成小fans嘅阿澤，緊張到抹晒汗，又拎電話出嚟，叫大家幫手影相集郵，阿澤話：「受到邀請特別興奮，城中名人派對我都好怕，所以冇去，但今次唔同，一個我好欣賞嘅廚師受勳，今次我唔係以電影人身份嚟到。」問係咪好開心煮嘢食方面獲得認同？阿澤竟然話：「梗係唔係啦！我連騎士都做唔到，莫講話咩騎士勳章，但好光榮可以嚟到。」

除咗謝霆鋒之外，阿澤近年亦醉心煮嘢食，而佢鍾意煮西餐多過中餐，原來最近有朋友想拉阿澤合作開餐廳，不過佢自覺仲未有資格搞私房菜，佢話：「斟緊間意大利餐廳，大廚放假就搵我客串其中一間VIP房，聽到之後係有興趣嘅，因為今次係做慈善，我唔夠鼎爺藝高人膽大，我係藝低人膽細，但做慈善就有興趣，成事嘅話，到時自己要諗埋餐單。」

至於網上平台，阿澤話做網每日都有改變：「之前想做飲食網站，講講下o依家變成live show，以搞笑為主，多人想做，籌備成隊team，平台主打夜晚。」性感女助手會唔會上鏡？阿澤就話：「冇，佢都係開吓門俾人，暫時唔會出鏡，佢讀新聞系出身，節目可能加新聞專題，叫佢出去拍片搜集資料。」

講到點慶祝老婆田蕊妮喺嚟緊嘅星期四40歲生日，阿澤話：「唔煮喇！以前煮過，佢成日食到，可能大班朋友唱K。」送咩禮物？佢笑話：「舊年送咗隻錶已經冇晒錢，你知我副身家，又唔係劉鑾雄，上次隻錶頂10年㗎，好彩我上次買時有得分期，唔係搞唔掂，如果我老婆崇尚物質早就走咗佬，最重要佢開心，我物色緊10年後再送咩禮物畀佢。」

同場嘅盧覓雪自稱係呢位大廚嘅常客，每次去澳門、上海、北京嘅餐廳，都會抽時間去捧場。佢又話到自己鍾意食零食，想搞網上零食生意：「我會加入新概念，一啲好食又出咗好耐但冇乜人知嘅品牌，同埋冇人引入嘅，我就會引入，新出嘅與食會做代購，同埋會生產啱自己口味嘅，各式各樣都有，希望今年內可以成事。」