第74屆威尼斯影展現正舉行，噚日都有一眾巨星行紅地氈出席活動，不過不約而同地都係年紀比較大嘅女星，例如82歲嘅茱迪丹慈（Judi Dench）同72歲嘅海倫美雲（Helen Mirren），不過最搶鏡都係70歲蘇珊莎朗頓（Susan Sarandon），因為佢嘅「招牌貨」谷胸戰衣又再次出場！

三位影后級人馬噚日都於影展行紅地氈，茱迪丹慈就連同新戲《維多利亞女王: 日不落奇緣》（Victoria & Abdul）男主角Ali Fazal一齊出席，而海倫美雲就出席金獅獎提名作《The Leisure Seeker》首映，不過最搶鏡都係出席The Kineo Award頒獎禮嘅蘇珊莎朗頓，雖然年屆70歲，依然照舊谷胸，又戴太陽眼鏡出場，認真霸氣十足。