公開同江若琳(Elanne)拍拖、組合Bliss前員嘅蕭潤邦(Oscar)，o依家專注其生煎包生意，今日為其大埔分店主持開張儀式，Oscar為氹女友，更喺左手紋上一個配上皇冠嘅E字愛的紋身，冧到爆嘅Elanne以「老闆娘」身份同Oscar一齊出席開張拜神儀式。

講到個愛的紋身，Oscar話：「我都係第一次紋呢啲嘢，個紋身師傅話紋英文字好叻，梗係紋個E字，媽咪唔會呷醋，媽咪係紋喺個心入面。」Oscar嘅媽咪今日亦有出席，但怕醜堅持唔肯同Oscar及未來新抱Elanne合照。Elanne就話事前唔知Oscar整個愛的紋身送俾佢，Elanne甜到漏咁話：「之前唔知呢個驚喜，好開心，佢自己有份設計，佢係一個好浪漫嘅人。」對紋身是否代表一生一世，Oscar笑說：「Elanne話如果係下個點搞。」Elanne笑說：「叫佢下個搵個都係E字，好似Evelyn、Eva。」Oscar就話試吓新嘢搵個Eddie。對於愛的紋身以E字配上皇冠，Oscar解釋：「女王囉﹗」

問到係咪真係咁「旺夫」，男友連開多舖充，Elanne同Oscar一齊扯開話題，指原先擔心今日天氣關係影響開張，Elanne話：「下一站會開喺銅鑼灣，所以下站先至大搞。」Oscar指今日大埔分店係其生煎包系列第3間舖，隨後銅鑼灣開第4間，年尾於荃灣再開第5間。對於有否分股份予Elanne，二人異口同聲話工作分得清楚，有人建議二人夫妻檔像「夫妻肺片」，Oscar笑言：「都好，我食得辣，又喜歡講癈話。」

對於生意上軌道，是時候求婚準備人生大事，Oscar話：「會啦﹗我哋會安排，到時會通知大家。」Elanne話未曾幻想過男友求婚嘅情境，Elanne話：「冇諗過，等驚喜，佢咁鍾意俾驚喜我。」對於二人會否趁旅行不慎造人，Oscar話：「好忙，未有時間旅行，做好間舖先，唔係點造人。」Elanne以內地形容詞回應：「嘩﹗你哋打黃槍﹗（講有味笑話）」Oscar笑言：「佢成日講啲內地用語，我聽唔明，打手槍我就知。」

Elanne嘅未來奶奶比Elanne仲要怕醜，Elanne話：「我哋成日都會見面。」而未來奶奶對Elanne有何評價，Oscar就話：「又靚、又好、又孝順，一得閒就一齊食飯，唔使約。」