新車落地唔夠一個月就俾人刮花咗，真心傷;但隔咗三個幾月都追唔返整車錢，就真係仲激心過俾人刮花架車。

講緊嘅係陸永索老婆Reina，佢經常都有喺ig講吓湊女心得同生活瑣事，followers都有逾13萬人，網上人氣唔會俾陸永遜色。今日Reina喺ig貼咗兩張電話對話訊息截圖，講番去年11月，Reina啱啱買咗架新車，因為讓人泊車，點知俾人刮花咗。呢場交通意外，對方願意簽和解紙同賠償，Reina亦應承唔返原廠整，因為可以平啲，最後開出約2,600蚊賠償費。不過，對方至今仍未俾錢，原因係整傷腳，所以連和解紙都簽唔到。

Reina當然唔滿意呢個答案，因為拖得太耐，佢好勞氣咁話﹕「人善被人欺，早知返原廠整claim保險好過！唔通我未收你錢，我同ah Sir講你已經賠咗畀我咩？落口供就落口供囉，輸咗我咪畀堂費囉?? 我有時間，我唔怕麻煩！黐X線，毛啦啦受你氣！我好等2600(蚊)開飯呀。」

唔少網民都話對方「多多藉口」、「離晒譜」，陸永當然撐老婆，留言﹕「我叫你搵佢，你都話等過埋初十五先追，仁至義盡喇，唔駛勞氣。」

更多娛聞，喺晒《娛果》
http://fb.com/appledailyent