紅姑鍾楚紅最近低調搞咗個攝影展，地點係喺灣仔聖佛蘭士街，一幢3層高嘅品味小店La Petite Maison XXII 3樓，噚日女首富甘比同好友Sammi就齊齊去撐場，Sammi仲拍埋片放上網，大家都睇得好開心！最搞笑嘅係Sammi「宣傳」時話相展3秒就睇晒！仲叫人唔使去添！

3秒？因乜解究幾秒睇得晒？

原來小店係紅姑幫襯開嘅，尤其係地下嘅花店，紅姑鍾意親自挑選嚟自荷蘭嘅特別花卉，亦同老闆好老友。今次紅姑嘅作品同小店嘅理念相近，就成功合作。

小店嘅構念係來自法國南部橄欖樹，店嘅各部份就係人嘅五感，所以店內有唱片、食物同日用品等發售。

而紅姑嘅作品只有9張相片，放置喺店中22 Studio工作坊內，分為普羅旺斯同教堂兩個主題，全以法南嘅美麗景物為主。相展現在至本月24號擺放，大家有興趣感受吓紅姑嘅品味人生或想碰碰運氣，睇吓同紅姑有冇緣份，就不妨過去睇吓啦！

地址：Studio 22 La Petite Maison XXII
聖佛蘭士街15號