地產代理行齊齊大事擴充，人手自然極度緊張，請極都唔夠。世紀21於是諗到，搞專區考察團，等有興趣嘅人士，可以實地睇吓，話唔定請到嘅機會可能大啲。
聽講，每個考察團為期三日，有興趣可以跟足三日，若只參加一日都得，每日約三十人，走訪世紀21各區共十個分行，行程緊密過旅行團，每間分行，都會派專人解答團友問題。
世紀21話，團友包括已報考地監局試嘅營業員，以及有興趣加入呢行嘅人士，3月底舉辦嘅第一團，參觀過將軍澳、沙田、馬鞍山、牛池灣、黃大仙、鯉景灣及中半山等分行。
世紀21現有一百二十間分行，預期今年內增至二百間，並要再增聘多一千六百人。佢哋話，會通過唔同渠道增聘人手。
唔知佢哋對手又有乜請人新招呢？

貝沙開波宣傳
薄扶林貝沙灣五座MaisonBel-Air準備開賣，消息人士話，已有單位預留，不過，發展商宣傳工夫依舊做足。本周末搞時裝表演，今日先開「皇者之旅」記者會。
發展商同渣打合作，以一個三千三百萬單位、承造七成按揭為例，可以獲贈二百八十萬分會所積分，以往只送四十八萬分。積分用嚟租法拉利，可以租四百八十粒鐘；幫趁美容服務，就可以免費用一百三十三次。
代理話，其實前晚已經開始接受預留，有四個二十樓以下單位獲預留，呎價萬二，本周六時裝表演當日，會落實成交。