今日（24日）上午啲雨落到極誇張，仲掛埋今年首個黑雨，但入黑後就只有間歇細雨，快活谷馬場上空更天氣不錯，一向疏水好嘅谷草，已跑咗上半場共四場，第三場起已由好地至黏地，變為掛牌好地，並取消咗原定於第4場後壓地的計劃。

暫時賽事走勢一個「放」字講晒，正所謂走得快好世界，上半場除咗第三場「多多勁驥」入直路由第二位追上贏外，其餘三場後上賽駒對腳好似黏住塊地咁，毫無追勢可言，全部頭馬都係一放到底取勝；而今晚大熱門似俾雨水淋熄晒，上半場大熱賽駒全部贏唔到。