【新增回應】
郭富城、楊千嬅、萬梓良等一眾演員噚晚喺大角嘴為電影《麥路人》開工，不過就好唔好彩遇到一名洋漢疑似醉酒鬧事，最後更要報警處理。（相關新聞： http://bit.ly/2MKofDP ）

噚晚9點幾，《麥路人》嘅一班台前幕後齊齊現身大角嘴取景拍攝，一名疑似醉酒嘅洋漢喺拍攝現場擾攘，影響電影拍攝工作，工作人員曾經上前勸阻，不過對方就一於少理，據知，場內更一度傳出爆玻璃樽嘅聲響，最終工作人員決定報警。警員接報到場，將鬧事嘅39歲洋漢Alexander制服帶走，並送院檢查，其間一名警員跌倒受傷，亦需送院。據稱，洋漢係附近居民，事後已獲釋。警方將案列醉酒人發現及警員執行職務受傷處理。

郭富城嘅經理人小美今日回覆《蘋果》話：「事發時城城、萬子哥和千嬅均在街尾的化妝間，劇組照顧得很好，不讓他們走近現場，免受滋擾。反而我和導演都在現場，親眼看到那個醉酒鬧事的洋人，他一直在拍攝範圍內的現埸，刻意胡言亂語和刻意徘徊地來回去影響拍攝，即使警察到場勸説，他不單漠視，其叫囂程度更變本加厲，幾近一小時，嚴重影響劇組拍攝，令大家很生氣，最後結果交由警方處理。因為滋擾聲浪太大，城城曾探頭出外望了一眼，被萬子哥叫回入內，因為擔心醉漢有利器傷到城城。所以大家一直在化妝間聽著吵鬧。」

千嬅今日回覆《蘋果》時話，噚晚聽聞有個外籍人士有啲擾攘，不過千嬅當時喺化妝間準備緊，同現場有段距離，所以睇唔到發生咩事。當時有工作人員叫佢喺化妝間等待，開機時先再通知佢。

《麥路人》係一部反映社會貧苦民生嘅港產電影，電影日前進行開鏡儀式，楊千嬅願意低價接拍，而城城為咗揣摩角色仲挨餓唔食飯，瘦咗成個碼，萬梓良亦坦言，因劇本同題材非常吸引，亦反映到香港嘅真實現象，所以就答應拍攝。

精選娛聞，喺晒《娛果》
http://fb.com/appledailyent