美國運通副總裁兼香港區簽賬卡業務主管李健偉，89年入AE，一做就19年，由三級營業員做起，幾乎所有業務都做過。佢話，當年科技冇咁進步，好多嘢都靠人手，好似發傳真，就要先用打字機打好封Fax，再傳出街；好多時仲要自己影印文件，再走勻公司派Memo，唔似得家吓一個電郵就搞掂。
李健偉𠵱家負責睇卡務，佢哋張AECenturion卡（黑卡），出名「有求必應」，皆因做得呢張卡嘅會員，消費同身家都有番咁上下，要求自然高人一等，究竟有冇試過MissionImpossible？李健偉話，黑卡會員簽賬次數，比普通卡多七倍，所以啲客有千奇百怪嘅要求，佢哋都要盡力做到。

幫鸚鵡搵新主人

好似早排有個客嘅女友，去咗雲南白馬雪山旅行，個客要求代為安排驚喜求婚活動，最後成功抱得美人歸。又有個客去完日本旅行，先後悔冇買到一張人手做嘅凳，返到嚟只係記得間舖頭喺邊，係咁意畫咗幅圖，就叫AE幫佢搵，好彩咁都搵到。
另外有個客移民之前要幫佢隻寵物鸚鵡，搵個有愛心耐性嘅新主人；最搞鬼係有個客，出親trip都指定要AE打morningcall叫醒佢，話信唔過酒店。