曾經在網吧度過兩年人生，每夜在網吧留宿的黑柴，現時已是網吧老闆。在許多人眼裏，網吧是個「唔正經」的地方，但在他眼中，這卻是貧窮人口的落腳地。

早已脫離難民身份的黑柴，現時每天下班後便到網吧看店，許多來過夜的客人都是熟客，每日來來去去，晃如看着當年自己的身影：「依家嚟網吧長期留宿嘅人好多都同我當時一樣，冇按金租樓，主要係上樓問題，佢哋好多都係想住劏房，但連埋上網費嘅話一個人負擔好重。」當晚記者所見，網吧內除了年輕人之外，亦不乏中年男士，「有啲人頭家喺大陸，自己落嚟香港打工，又唔想晚晚返深圳，就選擇留喺網吧過夜囉。」

黑柴指在網吧過夜的人大部份是男性，女性則較少見，「流連呢度嘅人多數係家庭問題而走咗出嚟，最多男人係衰爛賭，第二可能係懶啦，有工唔返，當然亦有啲人由高峰跌落低谷，想逃避屋企人同社會，等於依家嘅宅男宅女。」

不過他作為過來人，坦言不認為這群人「好慘」或是「好坎坷」：「如果佢哋肯努力，基本上係正常人一個。大眾咪叫貧窮人口囉，喺貧窮線之中唔係富有，但唔係窮到兩餐不繼。」

你敢爆，我敢獎！ 立即WhatsApp《蘋果》24小時爆相爆片熱線 或致電：63836568