由收視女王孔孝真同趙寅成主演嘅SBS新劇《沒關係，是愛情啊》，開播以嚟收視一直未如理想，不敵同檔嘅《朝鮮神槍手》同韓版《命中注定我愛你》。為谷收視，劇組今日公開趙寅成同孔孝真嘅激吻劇照。孔孝真、趙寅成同李光洙今日現身喺首爾舉行嘅記者會，孔孝真仲自爆同趙寅成拍親熱鏡頭無難度，暗示未來可能有更多更激烈嘅場景出現。

今日下晝，孔孝真、趙寅成同李光洙出席喺首爾弘大某咖啡室舉行嘅《沒關係，是愛情啊》記者會。記者會上，孔孝真笑言：「我身邊嘅人都迷上《沒關係》，尤其30至40多歲嘅女性，佢哋特別情迷趙寅成。」提到同趙寅成拍對手戲，孔孝真表示二人喺劇中嘅感情線發展迅速，咁樣仲能表現出非一般嘅浪漫。孔孝真又話因為同趙寅成拍攝大量親熱鏡頭而變得親近，所以拍吻戲時都唔會因為緊張而特別去刷牙或漱口，透露二人老友鬼鬼嘅一面。

孔孝真亦喺記者會上點名感激編劇盧熙京，坦然6月發生交通意外後心理負擔好大，但因為盧熙京嘅安慰同支持，令佢最後無放棄拍攝《沒關係》。噚日，孔孝真喺微博公開拍攝現場嘅花絮照，相中佢瞓喺片場嘅床上休息，床邊放咗支拐杖，粉絲睇完後都擔心佢係咪因為之前嘅交通意外而留下後遺症。

今日劇組公開趙寅成同孔孝真喺山谷間濕身深情對望，然後激吻嘅劇照，預示兩人嘅浪漫故事正式展開。喺今日播出嘅第5集中，池海秀（孔孝真飾）因為張載烈（趙寅成飾）帶其他女仔返屋企而發生爭執，之後佢哋一齊去睇演唱會，張載烈仲趁呢個機會對池海秀有更深嘅了解。

另外，由張赫同張娜拉主演嘅韓版《命中注定我愛你》今晚播第11集，李健（張赫飾）因遺忘症復發而忘記同佢相處已久嘅美英（張娜拉飾），當蘇醒時見到世羅（王智媛飾）之後仲同世羅擁抱。另一邊廂，美英不幸發生車禍，令人痛心美英同李健波折重重嘅愛情。早前，劇組公開張娜拉同張赫穿上校服嘅劇照，張娜拉嘅童顏令網友們嘖嘖稱奇。