《老表，你好嘢》進入結局篇，大團圓結局就一定0架啦，但有啲壞人做咗壞事，就要受懲罰……呢個，咪就係少山囉。

穿老友櫃桶底，仲要搶埋老友個未婚妻，少山仍然不知悔改，之後走投無路喇，仲綁架嘉儀(即係郭晉安呀﹗)呢一切一切，唔關編劇之一王祖藍事，亦唔關少山事，而係關演嗰個——阿Bob林盛斌事，因為佢頭先問咗一個好嚴重嘅問題，就係﹕ 「一直以嚟，我都有個問題收埋喺心入面，好少同人講，呢件事都困擾咗我一段時間，講真，『其實我係咪真係太靚仔呢？』」

獲馬浚偉隔空請食巨型雞子嘅曹永廉，食完幾隻小巨蛋之後，真係成個醒神晒，膽子都大埋，回應道﹕「其實你應該一直將呢個問題收在心裡，因為答案係好殘忍。」

咁即係擺明話阿Bob哥唔令仔，阿Bob都唔客氣﹕ 「其實成個香港演藝界，我自問係輸俾你同古仔，不過因為太多人話我靚仔過你又型仔過你，所以我先要問清楚！」