大家仲記唔記得舊年年初有單笑料，就係法國著名街頭藝術家Space Invaders喺天后清風街留低一幅以馬賽克砌成嘅「食鬼」作品，無端端被政府鏟走，唔少人鬧政府唔識貨，國際拍賣行蘇富比就當然知道Space Invaders嘅作品係寶喇。
香港蘇富比將於下星期二舉行今年首場拍賣，其中一個作品就係Space Invaders曾經喺跑馬地嘅創作，身穿空手道服嘅Hong Kong Phooey一腳側踢，藝術家借呢個作品向李小龍致敬，可惜原作已經被鏟走。
Space Invaders喺瓷磚玻璃板上再做一次，成為《別名：香港第五十八號》，被私人收藏家買入，呢位收藏家今次就交畀蘇富比幫佢拍賣，估價100萬至150萬元。雖然呢個價錢𠵱家連畀首期買樓都未必得，但係都好值錢㗎。