來自南非的練馬師苗禮德有份祖國情懷，在港開倉以來贏馬多數用鄉里騎師，今日第十場二班1200米，再次印證呢個情況。
苗廐4歲馬「龍城勇將」初跑快活谷，苗禮德冇因為上仗鄉里史卓豐幫唔到匹馬連捷做阿二而離棄佢，反而畀多次機會呢位在南非出世長大的90後騎師。結果史卓豐亦不負所托，策騎呢匹上季曾擊敗「包裝奔馳」之馬，最後百幾二百米於外欄如飛殺上，冚過晒內叠所有馬匹大熱2.9倍勝出，「龍城勇將」首戰谷草即贏，完成在港四捷，跨季9戰4冠3亞2季。
史卓豐連同第二場幫方嘉柏贏「南華勇將」在內，個人首次於谷戰起孖，不過騎師王卻以六分之微，不敵雷神無緣勝出。至於苗禮德季內累積四捷，由佢一對鄉里騎師史卓豐及田泰安各佔一半。
尾場組合獨贏開A1，每10元收18元，同場第三熱門「力闖」跑第二，連贏僅派79元，三、四名分別係74倍「貝連利」及16倍「喜益善」，四重彩42,711元。其中「貝連利」在蘇狄雄胯下末段左穿右插撲上跑第三，若然畀佢早啲望空衝線，隨時贏埋都得。