武漢肺炎疫情反覆，本於今年三月開季的甲一籃球聯賽屢次延期，最後籃總一刀切宣佈取消今季甲一，下季聯賽將不早於明年八月開季，意味本地籃壇自去年年中完季後將停擺兩年。消息一出震撼籃壇，有教練批評籃總過早落閘判死刑，球隊失去目標，一蹶不振；球員生涯短暫，空白兩年除打擊生計，更窒礙進步，有人炮轟籃總抱殘守缺，儼如清末朝廷不思進取；又有論調悲觀認為本地球壇不進則退，疫情暴露業餘聯賽過份依賴班主投資，復賽後籃壇勢見大洗牌。本報曾向籃總查詢復賽計劃，對回覆如形勢許可，明年初或會舉辦類似籃總盃的盃賽。

一如以往，今年甲一球季原計劃以三月銀牌賽為開鑼戰，聯賽緊接上演，但武肺來勢洶洶，球季一再延期，本來八月底銀牌賽正式開鑼，但第三波疫情來襲，籃總八月初突宣佈取消今年甲一球季，下一球季不早於明年八月舉行。籃壇本磨拳擦掌迎接開季，突被殺過措手不及，南華小前鋒梁兆華表示球隊訓練時接獲通知，其時眾人皆覺愕然詫異，「我哋為咗準備開波已經練到嘔曬， 突然間話要取消，我哋個個喺球場都『吓』一聲，教練都話咩事呀，冇人提前通知過我哋，我哋都係要上網睇先知。」效力福建的港將鄭錦興認為籃總決定太倉卒，質疑籃總何不觀察疫情，分階段宣佈停賽，「本來球季都唔長，再加埋之前已經停一年，如果去到下年八月先開，我哋足足空檔兩年。如果籃總階段性宣佈，咁大家可以有多啲部署， 例如第一階段去到三月，如果可以嘅話咪開波，唔係嘅咪到六月先開始，咁都可以搞兩至三星期嘅盃賽，起碼我哋唔會空白咗成個球季。」遊協教練宗銘達則指籃總決定如宣判「死刑」，球隊如泄氣氣球，「籃總太早宣佈喇，始終未知疫情之後嘅發展，唯有大家當休息，唔再去諗籃球。」紅褲子出身的他指當局不重視球圈，籃壇停擺多時，教練生計不保，陸續轉行，他漸感意興闌珊，「自問對籃球好有熱誠，但我都喺度動搖，我深信同我一樣諗法嘅人為數不少，同輩嘅教練傾計大家都覺得心灰意冷。」

球季陷入空白期對球員影響甚鉅，年屆35歲的鄭錦興已步入生涯黃昏，保持狀態成疑；26歲的梁兆華正值黃金時期，卻失去寶貴比賽經驗，他無奈指白白浪費時間，「南華咁好彩請到個好有經驗、教到好多嘢嘅教練，我都想睇下自己球場上表現到幾多嘢，而家突然間停咗，我哋又要重新學過晒，本來26歲學咗、27歲應用、28歲再進階，而家要28歲先再學過，真係好嘥時間。」他不滿籃總下決定時未有從球員角度出發，「佢哋為安全計就下年九月先開波，但好似冇乜喺球員角度去諗，好多球員想打多啲波令多啲人識佢，再大啲嘅時間好寶貴，可能得返一兩三年時間，你可以話後生有本錢都係一年時間，但對大少少嘅嚟講係好唔公平。」

籃總表示延遲開季為遷就國際賽期，鄭錦興和梁兆華認為如一切正常決定固然合理，但今年情況特殊，球員水深火熱，不滿籃總本末倒置，未有正視球員未能落場的首要問題，鄭錦興指「而家重要嘅係點開波，諗好點開波先去諗其他嘢，而家直頭冇波打，國際賽事點會打得好。」中、澳、台聯賽陸續重開，惟獨香港裹足不前，梁兆華直斥球壇空白兩年，球員退步，難以追上國際賽水平，「你話跟國際賽，人哋休息我哋又休季，但去到人哋開波喇我哋仲係休季，咁你打咩啫？以後唔好參加咪算囉，根本冇得打，落後一年就係一年，未來人哋攞啲18歲都打贏我哋，因為我哋都冇打過波。」

記者：洪量丰、許嘉明

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！