利物浦巴西籍球星菲臘比古天奴，由今年夏天一直盛傳加盟西甲豪門巴塞隆拿，至今「只聞樓梯響」。不過就喺歐洲冬季轉會窗即將開啟之際，巴塞隆拿嘅主要贊助商「一剔牌」，突然喺英國時間星期六晚上，在其官方網頁宣布：「古天奴已準備好閃耀魯營球場！」並呼籲球迷喺1月6號前買古天奴波衫，可以免費印上「古仔」嘅大名添！

雖然相關帖文好快就喺「一剔牌」嘅官網中消失，不過唔少球迷都成功Cap圖並喺網上瘋傳。唔少等到頸都長嘅巴塞球迷，認為古天奴應該好快會加盟球隊，一早掌握消息嘅「一剔牌」預先製作有關古天奴嘅產品；不過唔少利物浦球迷則認為，這可能只係黑客惡搞，或者係「一剔牌」另類嘅宣傳手法。

盡管外界盛傳古天奴加盟巴塞在即，不過紅軍領隊高路普則認為，球隊無必要出售自己嘅球星嚟達到收支平衡：「依家我只對古天奴嘅表現感到興趣，佢最近幾場嘅表現亦令我感到非常高興。」睇嚟古天奴呢場轉會肥皂劇，將會一直陪伴各位跨年囉！