當年今日

唔跟戰友過檔重有So
馮仁昭四圍超:學友、安仔以靜制動做一哥

蘋果日報 2003/05/07 00:00


外界好多人都以為張學友約滿台灣環球之後,會跟隨合作多年嘅老友鄭東漢過檔EMI、而許志安、蘇永康同楊千嬅亦會跟住黃柏高(Paco)走人,但原來世事無絕對嘅。
馮仁昭收到風,張學友已經動筆續約台灣環球,而香港就屬於上華唱片,雖然同佢合作多年嘅鄭東漢走咗,但學友始終喺環球(前寶麗金)咁多年,佢同台灣環球嘅工作人員合作得好開心,而且佢嘅歌神地位,加上𠵱家咁嘅市道,外面都冇乜唱片公司出得起錢挖佢過檔,咁就梗係一動不如一靜啦。

千嬅康仔走硬
其實自從洪迪入主香港上華同正東,做新嘅揸弗人後,佢同學友、安仔不時開會溝通,畀咗好多信心佢哋,所以除學友外,安仔亦落實咗唔會跟Paco走。其實之前一直有傳安仔同Paco關係冇以前咁好,皆因安仔不滿Paco旗下有太多藝人,未有足夠時間照顧佢,令佢近年聲勢下滑,加上黎明過檔Paco嘅金牌唱片,安仔留番喺正東,同陳慧琳繼續做一哥一姐,點睇都有着數。
至於康仔同千嬅就等約滿後走人,康仔同正東重有一張廣東同一張國語碟約,隻廣東碟噚日推出,而千嬅亦只係剩番一張碟約,佢就話睇埋呢張碟做成點先算,不過係人都知佢走硬㗎啦。

翁虹避非典四圍匿
翁虹最近俾非典型肺炎搞到好煩,上個月香港疫情嚴重,佢專登避去台灣,點知最近台灣病例增加,佢又走咗去澳洲避炎,呢幾日佢同喺當地定居嘅屋企人一齊,重參加咗友人嘅婚禮。原來佢上個月去台灣都參加咗一個婚禮,新郎以前重透過翁虹哥哥約佢相睇,𠵱家人哋結婚,可惜新娘唔係自己,佢話暫時對於感情事都唔會抱太大期望喎。
范植偉星洲封帝
早排憑《美麗時光》攞咗南特影帝嘅范植偉,日前又憑呢套戲喺新加坡國際電影節攞咗「最佳男主角」大獎,范植偉話好開心,佢重話會帶埋個獎返台灣見導演張作驥,不過因新加坡都係SARS疫區,所以佢一返台灣就要喺屋企自我隔離十日,佢話以前都試過七日冇出街,所以今次留喺屋企十日,應該冇大問題。

何超儀機場掃龍鬚糖
何超儀同男友陳子聰噚日拍住拖咁出現赤鱲角機場,兩個人見到記者一反常態,表現得十分友善,就連超儀亦有問必答,佢話:「我哋啱啱送完朋友機,順便落嚟買龍鬚糖,我哋兩個都好鍾意食。」最後佢哋買咗好多盒返屋企。

張曼玉日本會法國情人
張曼玉自從同法國老公阿薩耶茲離婚後,佢同梁朝偉嘅緋聞像霧又像花。噚日台灣有報道話,有人喺上個星期六見到張曼玉同一個法國男人喺日本出現,佢兩個喺千代田線明治神宮前嘅車站,好親暱咁步向竹下通方向,有人上前問張曼玉身份,佢重答:「是啊,我是。」睇嚟張曼玉仍然鍾情法國情人多啲。
empty
學友(左)決定唔跟老友鄭東漢過檔EMI。
empty
翁虹
empty
何超儀
empty
張曼玉
資料圖片