58歲的洪朝豐，與前妻葉桂好所生獨生子洪葉，如今在倫敦工作。自從洪朝豐懷疑自己生脷癌之後，一直在想，如何跟兒子談到自己的後事安排。

洪朝豐昨日在其藍田公屋寓所接受《蘋果》專訪，他稱：「我同個仔講，如果我死咗，就將我身體所有器官可以捐可以用嘅，全部攞晒出嚟，留番俾世界上有需要嘅人。」

「然之後，如果可以，唔好有喪禮。點解我話『如果可以』？我講得比較微妙一啲，係因為殯儀館喪禮我一定唔會有0架喇，但一個屍體喺殮房雪咗成個月出嚟，就好似五年前我媽媽死，我去殮房接佢遺體嘅時候，個樣係好難睇好恐怖，唔通真係可以咁嘅樣着件衫咁就擺落棺材、蓋埋佢，然之後就咁走？我相信唔係好可能。」

【要求海葬：我真係唔想我親人嚟】
「所以我估可能係一個好小嘅喪禮、化一個好簡單嘅裝，至親嘅人嚟見，咁就叫做完咗一個喪禮。我同個仔講，我真係唔想我朋友嚟，我唔想我親人嚟，我話你冇得好揀，因為你係我個仔，你要照顧我身後事。佢話點解你唔俾你朋友嚟睇你最後一面？我話因為我唔想佢哋記住我死咗嘅樣，我想佢哋記住我之前同佢哋一齊開開心心傾偈講笑食飯嘅時候個樣，跟住架車送咗我棺材去火葬場，燒成灰燼之後，我吩咐個仔攞去海葬，撒喺大海度。」

知道自己有可能患脷癌驚唔驚？尤其係你做DJ出身，又喜歡唱歌？洪朝豐說：「即使唔計呢次小手術，我睇耳鼻喉專科呢三個月嚟，個痛係越嚟越加強，同埋越嚟越深，越嚟越大。」

【你先知道你會慌0架，你會驚】
「初時個痛冇咁犀利嘅時候，你會比較輕鬆，知道有呢個病，又會做最壞打算，個人反而o依會放輕鬆咗，想見乜嘢朋友就會見乜嘢朋友，快快出嚟食飯，又或者想食乜嘢就食，想做乜嘢就快啲去做，但隨住個痛越嚟越大，對你影響越嚟越深，譬如你食麵包，麵包稍為硬啲，你都唔可以即刻轉你條脷去嘴嚼佢，當開始出現咁嘅情況，你先知道你會慌0架，你會驚。同埋當你食嘢嘅時候，你會痛。」

面對有可能要切脷驚唔驚？洪朝豐苦笑話：「我覺得一般人係好難真正了解，一條小小嘅脷對一個DJ幾重要，同埋有幾大嘅意義。一個脷嘅炎症係預視舌癌，行內人都會好敏銳，所以呢個病係我人生一件大事。」

【「中獎」患脷癌機會多少？「我覺得大0架」】
患抑鬱躁狂症10多年，o依家又有可能患脷癌，洪朝豐只覺得無奈：「分到都冇法子架，唔好論個天公唔公平，個天從來冇講係咪一定要公平，總之分到你咪要硬食囉。我從細到大都係一個好容易適應環境嘅人，煮到嚟就食囉。將來嘅嘢冇人可以預知到，見一步行一步，唔需要諗得太遠。」

覺得今次「中」嘅機會大唔大？洪朝豐諗咗好耐，然後苦笑說：「唔知點解，我都覺得大0架，但我會好努力漂漂亮亮咁同佢相處。」

採訪：魯吉
拍片：廖達燊
攝影：仇志德