鞏俐多年來攞獎攞到手軟，2014年憑《歸來》入圍金馬獎最佳女主角，當年佢本來有事打算缺席，點知大會有人係咁暗示佢會攞獎，所以鞏俐最終答應去。點知最後鞏俐大熱倒灶，輸咗畀《迴光奏鳴曲》嘅台灣女演員陳湘琪，鞏俐覺得俾人玩嬲到爆，公開炮轟金馬大會後曾聲言：「不會再來這個業餘的電影節，一點意義都沒有。」

為電影服務

不過呢個世界冇永遠敵人，曾經話過以後唔出席台灣金馬獎嘅鞏俐，今年突然反口，答應為11月17日舉行嘅金馬獎任評審主席，相信能夠說服佢改變主意嘅，非李安呢位台灣影人代表莫屬。
今年李安做咗金馬執委會主席，想化解金馬同鞏俐嘅恩怨，所以親自請鞏俐出任本屆金馬獎評審團主席，李安受訪時話鞏俐不單喺華語影壇舉足輕重，亦有豐富國際經驗，係金馬評審主席相當合適嘅人選。鞏俐就話：「電影是反映我們生活及夢想的一面鏡子，把一生奉獻給電影，為電影服務是我一生的責任與追求！感謝李安導演的邀請和信任，願為華人電影盡自己所能。」
撰文：馮仁昭