譚耀文、何佩瑜（Jeana）、陸詩韻、梁琤、余曉彤同鄧洢玲（阿旦）等，噚晚喺黃埔出席電影《辣警霸王花2不義之戰》煞科宴，呢套戲由拍攝首日喺澳門遇上颱風天鴿殺到，高掛十號風球，及至前日套戲近乎煞科，天文台掛咗一號風球，《辣警2》真係喺風起風落下完成。

劇組噚晚搞煞科宴，戲中多位霸王花都撐場，Jeana更被劇組台前幕後狂隊酒目標，幸好佢係千杯不醉，陸詩韻首次扮演霸王花，戲裏戲外都係梁琤好姊妹，陸詩韻仲話打上癮：「平日大家都覺得我好柔弱，好女仔咁，但觀眾睇得多都悶，其實我係好男仔頭性格，講嘢又冇尾音，今次拍戲正好可以畀觀眾睇啲新嘢，我首次拍動作電影，真係打上癮，我哋個個霸王花都唔錫身，打到周身瘀痕，拍得呢類戲，錫身就不如唔好拍，我對做打女好有興趣。」陸詩韻仲話戲中有唔少開槍鏡頭，佢自爆稍後會去考槍牌。

此外，噚晚仲係投資者《YES!》老闆徐明華牛一，呂珊仲識做帶領大家唱生日歌為壽星仔賀壽。