呂良偉喺尖沙嘴投資過千萬，開設美容健康管理中心，太太楊小娟、向華強夫婦、張玉珊、蘇永康、汪詩詩、汪圓圓今日到舖頭齊齊參加開張活動。

呂哥同楊小娟經常大晒恩愛，今日就講到太太楊小娟廚藝了得，令老公有口福又幸福，小娟話：「媽咪好鍾意煮食，我嫁咗之後，老爺就好鍾意整廣東菜，自己都學習，所以我識整百幾個餸，我同阿呂咩都食，但就有運動同做氣功，每日25分鐘，你睇我生完仔好肥，160磅，依家108磅，我嗰仔都已經十六歲。」

大家都讚呂哥保養得宜，阿呂好謙虛話：「因為有個好老婆。」小娟仲講笑話：「阿呂話我日日都昅住佢，我做人有要求好奄尖，佢唔買衫唔睇衫，全部都係我安排，買返嚟就啱身，佢一定要我買減價貨嘅衫畀佢，我就可以買貴衫，因為佢話反正都啱點解要買咁貴。」呂哥話：「要慳啲，一個人洗錢已經好勁，我唔可以咁，但係小娟就好叻經常搵到啲減價貨。」

就嚟父親節，兩人話12號就會飛去英國倫敦，同囝囝一齊過節，囝囝喺當地讀緊劍橋，小娟話：「阿仔冇daddy咁fit，佢仲未識呢啲嘢，媽咪講佢係聽唔，第日有女朋友就會識。o依家佢喺外地讀書，有學自衛術，我都驚佢畀人蝦，我哋唔想佢打交，但係要識得保護自己唔好畀人蝦。」

今次店舖會喺大陸發展，小娟透露現時呂良偉喺大陸註冊商標，已經有近150個，與健康管理有關，睇好大陸健康市場，目標未來3年時間左右可以上市。呂良偉話：「開呢間店主要想畀大家知道，男士們好似我咁都可以靚、後生、健康，唔係女士專利，男士仲未醒覺，所以舖頭會以男士為主，女士為副。」

蘇永康十分欣賞阿呂努力，大家男士都唔想肥，佢話自己都好有恆心keep fit，比之前瘦咗十幾磅，控制飲食同運動方法減肥。蘇永康話患有淋巴閉塞，屬水腫型肥胖，要靠針灸去水腫，現時170磅左右，希望減多十磅。

今年父親節佢要喺紐約工作，會提前同屋企人慶祝，今早發現囝囝有一件趣事，就係囝囝日前睇咗前幾年郭富城唱梅艷芳《夢伴》歌曲嘅畫面，今早起身見到阿仔高舉手指扭身扭勢，蘇永康話：「阿仔天生節奏感好強，相信佢對音樂有天份，都會畀佢上音樂班，但唔希望佢做呢一行，不過成長之後都唔到我諗，但一定要讀好書。」

精選娛聞，喺晒《娛果》
http://fb.com/appledailyent