現今快活谷中距離最強係邊隻馬？以賽績計，「精明才子」係應屆谷中唯一分級賽一月盃的盟主，本身高達116分，實力毋庸置疑，但亦由於評分較高，故相信要到明年新一屆一月盃舉行時，此駒始再有機會踏足谷中。

除「精明才子」外，已報名周三（11日）谷草開鑼戰二班1650米列正選、呂健威馬房「幸福分享」亦具備谷中王者級數。

此駒兩戰谷草未輸過，俱贏二班1800米，一次拋甩大勝「翠龍」3.25馬位，另一次亦輕勝對手一個馬位。睇番「翠龍」歷來四次角逐級際賽，三次跑入前四名，「幸福分享」能夠視「翠龍」如無物，可見此駒谷中戰鬥力之強。

事實上，「幸福分享」體重不足1,000磅細細粒，走位靈活，在急彎短直路的谷草，特別容易取得平衡加速殺上。

今次再跑谷草，冠軍騎師潘頓亦十分識貨，在杜美爾手上重新搶回帥權，而且出奇地非常畀心機親操「幸福分享」多課，不但包辦了此駒近五課快跳，而且在8月底主試一課大閘，對牠的緊張程度，猶如策一級馬跑大賽。而該次試閘馬兒追勢不弱，狀態亦肯定已達爭勝水準。

值得留意104分之「幸福分享」若今仗不勝，便要等到明年一月盃，才有機會再跑谷草，屆時便要面對強敵「精明才子」，難怪潘頓成擔心機操「幸福分享」，無非要把握今仗難得的機會，贏咗先算。

-------------------------------
想唔想知自己財運、事業、愛情會點？參加《玄機解馬》節目，可免費畀美女堪輿學家唐碧霞睇八字、睇相指點迷津，快啲入嚟報名。
https://forms.gle/dN9hfSiFxc7T8E436
-------------------------------
馬匹賽績、騎練數據、名家貼士
【最強贏錢武器 盡在蘋果馬網】
https://hk.adai.ly/e/5nFdCiYq8Y
-----------------------------
【撐學生】
召集有心人 撐學生全年睇《蘋果》
立即按此