毛玉萍跟前夫所生嘅兒子俞俊材（Eric），今日同地產代理太子女任靄婷（Jacqueline）拉埋天窗，一對新人喺灣仔會展宴會廳共諧連理，筵開80圍招待親友。

傍晚約6點左右，新郎新娘接受傳媒訪問，Eric一時口快快講：「好開心，好感動，第一次娶新抱。」由娶老婆講錯做娶新抱，Eric都忍不住笑。佢又大爆接新娘時要做瑜伽同飲特別炮製嘅飲品，亦講愛的宣言，話愛老婆一生一世，新娘Jacqueline甜笑：「收貨，一百分。」佢哋都話生仔計劃要順其自然，雙方長輩都冇俾壓力，不過Eric最希望生對龍鳳胎，佢表示簽紙時有感動到喊，婚後會去馬爾代夫度蜜月，享受陽光與海灘。

有指新奶奶毛玉萍送咗一億豪宅做結婚禮物，Eric直認：「係，好開心。」咁禮婚宴開支，Eric就守口如瓶未有透露，Eric指母親毛玉萍寄語佢哋婚後要互相包容、遷就同愛錫老婆，做個負責任的老公，新娘Jacqueline即係旁邊話：「佢已經做到啦，好好。」