入行多年、14歲就參加新秀歌唱大賽獻唱一曲《心債》嘅李蕙敏，噚晚喺九展開咗佢第一個演唱會——一連兩場嘅「FOREVERLOVE2014」，莊思敏、莊思華、張達明、陳庭欣、賈思樂及李蕙敏音樂路上最重要的人——黃偉文都來捧場。老公仔SergeMicallef穿上大會Tee在場打點，非常落力。

噚晚全場約八成滿，李蕙敏共換咗五套衫，唱到第3首《贈興》已走音，全晚都聲沙沙，就連講嘢都走音。一出場以金色宮廷裝打頭陣，最性感係一襲美國旗服飾，中空上陣現尖金bra，非常惹火。

李蕙敏一出場就話，佢唱歌嘅形象深入民心，其實佢都拍過好多戲，大約50部，包括《家有囍事》同《新上海灘》，講完即唱咗多首電影歌曲，及播放佢有份參演嘅電影片段，令人回味。

靚佬王敏德打頭陣任嘉賓，合唱《Flymetothemoon》，李蕙敏話邀請王敏德係因為二人有緣份，曾合作拍MV同電影，之後又考王敏德記唔記得當年兩人拍MV時可有親熱鏡頭？王敏德話:「記得，不過唔講得，因為老婆喺後面，好驚。」之後王敏德solo唱英文快歌，又大跳moonwalk，全場high爆。

李蕙敏又於台上換衫，仲借此答謝伯樂黃偉文。佢話:「喺fashion方面，Wyman好有成就，佢另一個成就就係填詞。佢係我音樂歷程上一個好重要嘅人。」接著一口氣唱出三首黃偉文作品，包括《吻感》、《垃圾》同《大開眼戒》。

另一嘉賓係倫永亮，李蕙敏換上黑色deepV長裙，兩人合唱《沙沙的雨》，倫永亮大讚李蕙敏好漂亮又好nice，更謂綵排時因為自嘲唔夠女方咁高，故今日李蕙敏特地著番對矮啲嘅鞋就番佢。

李蕙敏又話，拍《新上海難》時，哥哥張國榮同佢講:「蕙敏，如果你開騷，我要做你監製。」可惜此願望永無法達成。李蕙敏謂:「希望遠方嘅佢知道我終開到，會為我開心。」之後即一人分飾兩角，獻唱《芳華絕代》。

李蕙敏又話，另一個對佢影響深遠嘅人，就係梅艷芳:「梅姐喺我失意時俾好多意見我，從小梅姐對我嘅想法影響深遠。」接著即唱出14歲時參加新秀、梅艷芳一曲《心債》。