以往好少有緋聞嘅馬國明，同黃心穎拍拖以嚟身邊嘅人都想佢哋開花結果，成日都有報道跟進佢哋感情狀況，早前有報道指女友黃心穎同富二代撻着，馬明就收好人卡（新聞連結： http://bit.ly/2BJ4T9d ），馬國明今日同胡定欣、唐詩詠、王浩信、田蕊妮等人喺將軍澳出席大台頒獎禮記者會，再次講到「不婚即分」呢個問題。

對於有指黃心穎同富二代撻着，馬明話報道幾搞笑，同時要恭喜心穎：「如果係真就要恭喜佢，代表佢係好好嘅女仔，好有條件。」至於有傳以結婚綁住心穎，佢就話：「冇諗過咁快結婚，冇傾過呢個話題，所以冇咩逼婚、不婚就分手。」但馬明都坦白嘅，佢話拍拖都係以結婚為前題，又強調同心穎感情冇變：「仲係了解中，要繼續了解。」

契哥傳情變，唐詩詠有冇關心吓馬明呢？唐詩詠話啱啱旅行完返香港，未睇到新聞，只係話支持馬明可以得獎。至於視帝人選，馬明就睇好歐陽震華，因為演喜劇其實好難。

胡定欣就支持好姊妹姚子羚可以拎最佳女配角，佢哋一班姊妹套旅遊節目《胡說八道真情假期》都有提名，話想成班人再去多次，但要等到胡杏兒囝囝大啲先易就期。

更多娛聞，喺晒《娛果》
http://fb.com/appledailyent