英國名人社交雜誌《Tatler》每年12月都會熱選20、30歲嘅全球名人、貴族王室、富二代、星二代等未婚嘅靚仔靚女，以佢哋衣着品味、事業範疇等表現等為門檻集結成《Little Black Book》，係當地上流社交界嘅人氣指標小聖經，《英國電郵》、《每日郵報》都有報導有邊啲人士上榜，更會以「Coolest people in the world」、「Most Eligible bachelorette」(最有資格單身筍盤)標題形容。

今年年度名單剛出，有3個亞洲地區人士係首次入圍，當中兩個嚟自內地，而香港就有賭王四房大女何超盈，雜誌形容為熱衷慈善、藝術界要人等，更指超盈喺唔少國際社交活動、時裝盛事無處不在，以平民Topshop襯品牌嘅時尚風格。相信超盈今次獲英國社交界認同，相信同佢之前9月喺倫敦參加咗當地成人禮舞會Queen Charlotte Ball有關（相關新聞： http://bit.ly/2fU6qzY ），當時超盈同奧地利王子做舞伴，仲有唔少當地傳媒報導。

呢份名單入面，其實大多數都係英國名人貴族，好似哈里王子、安德魯王子兩名千金比阿特麗斯公主(Princess Beatrice)及尤金妮婭公主(Princess Eugenie)繼續係榜上有名、影星Nicholas Hoult、英國萬人迷碧咸（David Beckham）大仔Brooklyn，Mick Jagger一對仔女Lizzy同Lucas、Oasis主音Noel Gallagher Anais等等。