行政局前首席議員鄧蓮如男爵返香港度假兼慶祝大壽，亦抽時間與舊部見面，噚日參觀廉政公署北角新總部，視察香港最新反貪情況。
鄧蓮如89年至95年擔任廉政公署投訴事宜委員會主席，就廉署人員操守和誠信事宜向廉署提供意見，呢次巡視，據講係早前見到廉政專員湯顯明碰頭時提出。

讚揚建設研究中心

阿姐咁賞面，湯顯明歡迎之至，一眾高層噚日倒履相迎，執行處首長李銘澤、執行處處長（私營機構）李俊生、執行處處長（政府部門）黃世照、社區關係處處長穆斐文、防止貪污處處長歐陽呂妙群同助理處長（行政）黃卓惠娟空群而出。
廉署新總部富麗堂皇，鄧男爵先後參觀咗展覽廳同廉政建設研究中心，聽取廉署過往重大案件簡介。港英年代成立嘅廉署，回歸後被視為守護香港核心價值最重要機構之一，鄧蓮如係過來人，特別讚揚香港嘅成功，有賴良好法治同廉署努力。
鄧男爵對一年前成立嘅廉政建設研究中心讚譽有加，指中心有助地區及國際間於廉政研究和反貪工作經驗合作同交流。