謝霆鋒今年回歸樂壇，但佢並冇忘記自己係「Chef Lemon」嘅身份，早前佢獲邀參與FOX Life原創節目《名廚爭鋒》第一季，同加拿大星級名廚David Rocco，節目一連五集，日前播咗第一集，第一集去澳門搵食，由當地名廚揀選一款澳門地道美食，然後佢哋矇眼試食，試食後要喺三個鐘內買餸，用自己嘅style去煮呢款菜出嚟，原來係要煮非洲雞。

對於矇眼試食環節，Chef Lemon覺得難度幾高，冇咗視覺之後，個腦會估好多古怪嘢出嚟，後尾每一道菜反而唔係以食為主，當食完主要食材之後，其他就係用手捽出嚟，到底飯係用大米定小米，試食完後立即開始比賽，Chef Lemon一馬當先跑去街市買餸，只見佢又買臘腸、無花果，好快買齊晒材料，離開街市前遇到David，Chef Lemon主動教David買雞，跟住陰陰咀講：「Chicken in Cantonese is『狗』。」David冇懷疑，竟然對住雞檔個老闆，指住隻雞問：「is it狗？」老闆成頭黑人問號。

Chef Lemon買完餸趕去廚房，再問David拎咗啲乜嘢返嚟，David就用廣東話講：「狗。」然後向Chef Lemon笑住單眼，明顯知道自己被整蠱，霆鋒就忍唔住轉身大笑。

比賽完結，三位評判以賣相、味道、地道同創意四樣作評分準則，首先試食David嘅非洲雞，評判表示David嘅菜式好接近原本嘅味道，特別鍾意佢個crispy risotto呢個idea，但喺展示同上碟方面要改善一下，而霆鋒嘅菜式，評判好欣賞，解構原來嘅菜式之後能重新製作，成為獨有嘅混合菜餚，上碟方式亦唔差，最後22：21嘅分數，Chef Lemon以1分先贏。

精選娛聞，喺晒《娛果》
http://fb.com/appledailyent