今日香港電視開台禮，黃芷晴同爸爸黃日華一同接受訪問，換上一襲黑色喱士吊帶裙，露出深長事業線，非常性感。芷晴笑言喺屋企試裙時爸爸睇見都「嘩」一聲。而黃日華在旁就表示唔會介意:「都唔係好過份啫。」

芷晴表示喺台上嘅表演籌備咗個幾月，記者問黃日華有咩意見?佢笑謂:「小兒科，ok啦冇乜失手。」黃日華又話經過上年開台失敗，希望今次開台係一個好開始，又話唔介意自己所演嘅劇集未能成為開台劇。講到剛於午宴中播出嘅《選戰》預告片，黃日華表示:「好適合依家時勢，如果係其他台可能已經禁播啦。」王維基喺台上表示2月可能會再開始拍攝新節目及新劇，華哥表示:「好!台前幕後大家多咗工作機會，自己會睇時間配唔配合到。」

喺午宴中芷晴同日前傳出不和嘅黃美棋同台演中但無甚交流，芷晴表示冇尷尬，更聲稱大家「冇嘢」。黃日華就話自己冇留意個女被傳與黃美棋不和:「不過佢入行第一日我就同佢講會有是非，自己要有演員道德，唔好製造是非，但又唔可以俾人恰，有道理唔怕講同爭取。」問到華哥太太係咪百份百康復?佢話:「基本上係，精神愈嚟愈好，覆診期都可以拖長，多謝大家關心。」