當年今日
關於我們

馮仁昭四圍超:
家輝贈言:做咗老竇唔好癲 鎮宇儲定奶粉餵B仔 - 馮仁昭

蘋果日報 2008/09/30 00:00


吳鎮宇老婆周日早產一索得男,做咗老竇嘅佢,梗係開心到飛起,前晚同黃秋生、劉青雲及張家輝等好友飲酒慶祝後,噚日下晝一點半佢坐住保母車到養和醫院探老婆,見佢攞住大袋小袋,又有兩壺湯同相機,認真大陣仗,佢話:「上去會同BB影相,佢好得意,諗唔到佢會早咗成兩個星期出世,搞到老婆生時,我唔可以喺佢身邊。」
empty
戴住佛珠嘅鎮宇帶備湯水(右圖)同相機,諗住同B仔影靚相。
empty
指青雲恨有BB
至於囝囝嘅中文名,鎮宇話留番畀長輩去改,英文名就改咗叫Feynman,鎮宇笑笑口講:「Feynman係一個我好喜歡嘅科學家,所以個仔都要改呢個名。」15分鐘後,張家輝車住老婆關詠荷嚟醫院,家輝話:「我同老婆嚟睇吓鎮宇一家三口,希望鎮宇做咗老竇後,個人唔好咁癲啦!我會送啲育嬰教材畀佢。」佢哋幾個老友當中,𠵱家只剩青雲未有小朋友,家輝笑住話:「青雲都想生仔,但𠵱家就生咗兩粒瘡。」
家輝又爆鎮宇唔單止鍾意儲紅酒同白酒,最近幾個月仲儲咗好多奶粉,所以個仔唔憂冇靚奶粉飲。探完BB後,家輝離開時又話:「鎮宇個仔個嘴最似老竇,腳仔又好長,都幾可愛。」
大約4點,鎮宇都離開醫院喇,問佢老婆幾時出院?佢答:「等醫生決定啦,我聽日仲搵咗工人嚟醫院照顧老婆,到BB出院後,BB會由老婆自己照顧,唔會請奶媽嚟湊。」
empty
家輝帶埋老婆關詠荷嚟探鎮宇太太同B仔,認真有心。
empty
李嘉欣噚日同家姐(右)喺養和出現,問佢探邊個,佢一言不發就急急腳離開。