因為身形纖瘦同獨特打扮造型，不時被網民覺得勁似緬甸國務資政昂山素姬嘅香港本土立法會議員「Miss Mo」毛孟靜，原來由細至大都咁fit，絕非偶然，而係因為一直刻意節食，除咗每日唔食早餐、只食兩餐，仲每餐只食五、六分飽，極少食甜嘢，加上工作關係經常走來走去，同喺屋企做芭蕾舞基本動作運動，先會10幾歲到𠵱家60歲，40幾年嚟仍然咁苗條。
有一個阿哥、同兩個家姐嘅Miss Mo，中學時就讀名校聖保祿中學，細個時爸爸經常閱讀回歸前已停刊嘅《星島晚報》，佢亦都會讀報，留意到副刊有唔少講蘇聯獨裁統治文章，令到當年12、13歲嘅Miss Mo，已經知道咩叫極權政府。

入學聯中學組派單張

Miss Mo中二已經認識當年工運領袖劉千石，仲做埋學聯中學生組成員幫手派單張，中學後期更開始反思：點解香港要做英國殖民地？點解中文唔係法定語文同釣魚台等社會議題。
中學時文科成績一向好好嘅Miss Mo，中四因好勝心強報讀理科，結果會考理科成績麻麻，中五畢業後去咗加拿大升學，喺渥太華卡爾頓大學新聞系畢業。大學面試時雖然要用英、法兩文，但完全難唔到Miss Mo，因為佢母校中二至中三已有法文讀，有晒法文根底。
大學畢業後，Miss Mo入咗法新社做記者，之後俾當時無綫新聞部主管黃應士撬咗去TVB幫手，做咗兩年零八個月後，由於要湊兩個囝囝，轉咗去港台做兼職傳媒人。其後更係由傳媒界轉入政壇，2006年創立公民黨後，正式踏上參政之路，2012年起做立法會九龍西直選議員至今。

李八方