當年今日
關於我們

【動作演員後繼無人】王馨平成「寶麗金七小花」 曾國祥兩奪導演獎

蘋果日報 2017/05/30 00:02

王馨平洪天明曾志偉曾國祥錢小豪洪金寶王羽李泳豪龐景峰李家鼎

香港武打電影自30年代起已經為電影業撐起半邊天,而由武俠轉型到動作片更加令香港電影業蓬蓽生輝衝出國際,而以下呢幾位亦為香港武打電影做過唔少貢獻,而且佢哋嘅子女亦都承上接下繼續喺娛樂圈工作。
王羽  - 王馨平
亞洲電影喺開創新武俠浪潮嘅過程中,王羽可謂第一代嘅代表人物,而其中《獨臂刀》可以話係佢嘅作表作,97年後退出影圈喺台灣營商亦頗為成功,佢老婆係已故女星林翠(原名曾懿貞),兩人育有一女王馨平。
王馨平喺大學四年級時,佢同學將佢唱歌錄音寄俾唱片公司,後得香港寶麗金唱片賞識,順利簽約,與劉小慧、黎瑞恩、湯寶如、周慧敏、關淑怡、陳慧嫻並稱「寶麗金七小花」,著名歌曲有《別問我是誰》、《問你問我》、《伴你一生》和《生命有價》,2001年同金融界任職的男友李家輝(Stephen Lee)結婚,婚後淡出演藝圈。
洪金寶 - 洪天明
洪金寶喺香港出世,早於9歲的時候,洪金寶就開始涉足電影,係位多才多藝嘅動作巨星,由演員到導演以至電影出品人都擔任過。七十年代未至八十年代中,拍咗大量動作喜劇,如《老虎田雞》、《搏命單刀奪命槍》、《鬼打鬼》、《雙龍出海》等等。呢啲電影係當年紅極一時,更令動作片、喜劇成為香港電影最成功、最受歡迎嘅片種。
洪天明一路活躍於大台各劇集當中,高大威猛形象更深入民心,演技獲網民認同,而且頻密出席遊戲節目,被網民戲稱為「獎金獵人」。
曾志偉 - 曾國祥
曾任職業足球運動員嘅曾志偉,喺一次偶然機會下,經洪金寶介紹進入娛樂圈,後來更被劉家良賞識,因而遠赴台灣,加入電影公司做龍虎武師,隨住香港武俠片沒落,武行工作只能夠維持生活,喺朋友建議下,曾志偉開始逐步嘗試電影幕前同幕後工作,開頭只係演喜劇,後來轉型成功,演技被影評人與觀眾讚賞,演出非常多元化。
曾國祥一開始為演員,其後導演天賦漸露鋒芒,首部執導電影《戀人絮語》獲得第47屆金馬獎「最佳新晉導演」提名,2016年執導的電影《七月與安生》獲得第53屆金馬獎最佳導演提名。
李家鼎 - 李泳豪
李家鼎十八歲嗰年,做暑期工嘅時候認咗關正良教頭,拜師後開始習武,練過太極拳、詠春拳等,二十歲開始做龍虎武師。其間有數間電影公司想請佢做男主角,但係佢為咗養家而放棄薪酬較低嘅演員工作,繼續任武師,至今已經超過四十年,偶有喺大台劇集出現。
李永豪係李家鼎同施明嘅細仔,6歲起同哥哥一齊做童星,多部電影及電視劇都可以搵到佢嘅身影,不過近年就開始專注於賽車場上,更計劃開車隊出賽。
錢小豪 - 龐景峰
錢小豪自幼跟隨大聖劈掛門嘅冼林旭師傅習武學拳,14歲時,錢小豪因為喺功夫擂臺比賽中獲自由搏擊銅牌被電影公司睇中,進而加入邵氏電影公司訓練班,自1970年代末起,錢小豪演出超過90部影片,其中以武打動作片及「殭屍」系列最深入人心,不過隨住動作片衰落,錢小豪亦逐漸轉型,開始嘗試演出其他風格嘅角色。
龐景峰自幼習武,識詠春、泰拳、及洪拳,而跆拳道更取得黑帶,更加係跆拳道港隊臨時成員,每年都會出戰黑帶比賽,對武術有濃厚興趣嘅佢出道前曾參與電影蔡李佛嘅拍攝,除左武術之外佢歌唱亦非常了得,曾經喺美國同韓國接受訓練。