新地同恒基兩大地產商發展嘅紅磡半島豪庭，由於已不是全新盤，略欠新鮮感，係時候搞搞新意思，引人注意嘞。於是乎，發展商喺今個月初，推出睇樓抽獎活動，只要填寫抽獎表格，就可參加抽獎。
獎項為價值三萬蚊嘅「挪威之星號十一天夏威夷雙人海陸空旅遊」，可能係獎品夠瞄頭，有成六百幾人參加，反應都算熱烈。昨日由兩大頭頭，新地代理執行董事蘇仲強及恒基營業經理張炳強，抽出幸運兒（圖一）。
以貨尾盤嚟講，賣得不過不失。月頭至今，就沽出九個單位，聽講，以千二方呎單位較暢銷。買家若果揀即供分期，重可以有38.8萬現金回贈。
不過，發展商因應個盤多中港商人追捧，特設贈送九萬蚊一年往來港穗火車優惠，暫時尚未發市，莫非班中港商人忙於傾生意，唔得閒買樓？
寶雲滙七八座另命名
走中價豪宅路線嘅荃灣寶雲滙，雖然僅二百餘伙，但嘉里建設構思嘅市場推廣就未停過。繼頂層單位另外命名後，再將第七及八座兩幢住宅名為TheMotif。據知，日前已賣咗兩個。其中低層A室，1488方呎，連車位以525萬售出。
聽講，現時該盤第一、三、五同七座可即時認購，但第六及八座單位，則要先入票，待通知揀樓。第二及九座公開發售單位，到𠵱家都重未決定推出日期。
將軍澳中心代理行擺陣
地鐵將軍澳支線通車之後，區內樓市交投有起色，近期焦點落在新地等發展嘅將軍澳中心，發展商以優惠促銷，地產代理行就喺商場內開分行，幫手造勢。
噚日利嘉閣分行率先開張，今日就輪到中記。新地地產代理總經理周國賢同副總經理嚴道傑，都畀面出席剪綵。美聯物業同香港置業亦會在將軍澳中心商場開店，睇嚟好快都會搞開幕，有排熱鬧。