香港人在六十年代唔識排隊，在巴士站、電車站尤其離譜，人有人圍在車門爭上車，車上賣車飛的「巴士佬」手腳兼用地推人下車，駕車的車長又理得你少，就算有三四個人一隻腳擠了上車，另一隻腳仍在路上，車長都照開車，因為他們的想法是：「我開車，你仲唔伸番隻腳落地！」但擠上車的人就諗：「我半身上了車，你敢開車？你一定要俾我塞埋另一半身上車……」唉！真係隨時死幾件。可是這些險象橫生，日日如是，站站如是！真要多謝地鐵教識香港人排隊。
另一樣香港人的驚人事係去睇戲。就算在八十年代，大家仍可以在戲院吸煙，絕冇非吸煙區。全院煙霧瀰漫，由放映機的小洞直至銀幕都可以明顯見到一條巨大煙柱，而且一定有煙民坐附近。「啅」的一聲，一個開始食煙，附近六七個又跟住食。六七十年代更驚心。兩張椅可以坐一家五口。B女又在喊餐飽扭眼瞓，阿爸罵阿媽，阿媽又罵仔，突然B仔尿急，當然就地解決。你知戲院有少許斜，噢！那股暖流就一直向前面幾行座位流……不過大家去睇戲都好就得，很少發生衝突的。可能你做初一，我做十五心態。記得那時，看九點半，最鍾意在戲院門口買煨魷魚、夾餅、烚熟花生，搣到一地花生殼，買碌熱蔗，咬到一地蔗渣。睇完戲，拍下籮柚就行！現在睇戲真是天堂。
細時，冬天很喜歡消夜，一人一條熱蔗。最平又最襟玩的娛樂。一碌一呎長的熱蔗食你半粒鐘，咬到牙血都標。不過好開心的，因為大家圍埋在廚房垃圾桶邊食，邊食邊吐渣，食到個「結」時，又會叫何翩用刀斬去個「結」。
夏天又有不同的享受，天口熱，又冇冷氣，最鍾意就是行過涼茶鋪整杯冰凍蔗汁，嘩！透心涼。舊時涼茶鋪和現在街邊的蔗汁味道都有一段距離。現在的蔗汁有種假甜味，甜而不清，就好似飲咗杯凍糖水，絕不透心涼。真正的蔗汁味已很少鋪有得飲。首選中環「公利蔗汁」。店鋪仍有古舊水磨石的門面，正正是我哋小時的涼茶鋪。他們的蔗汁是蔗！清甜，真的可以解暑透心涼。店子由兩姊妹打理，她們說她們的鮮榨蔗汁係先蒸後榨。我哋喺街邊見到一拿起碌蔗就塞入榨汁機榨，真的有很大分別。另外還有蔗水，是蔗加入紅蘿蔔、茅根等煲成。鋪內牆上有告示指出炮製蔗汁的方法和好處，能潤肺、降火、除痰、止咳、解渴、開胃醒腦、消燥……消燥？而家又有幾聲咳，都係快啲去整兩杯飲吓！
夏天未飲過「公利蔗汁」點叫過夏天？！

公利蔗汁
地址︰中環荷李活道60號地下
電話︰2544 3571
營業時間︰11am-10:30pm
詳情： http://bit.ly/2LBGrP8

（原文刊於2009年728期《飲食男女》）

蘇施黃Profile
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

立即免費下載《飲食男女》App ： http://onelink.to/etwapp
《飲食男女》網站 ： http://etw.hk