當年今日
關於我們

【央企侵港】中央控制港企 金融中心勢難保 學者︰一定嚇到外資走夾唔唞

蘋果日報 2019/09/13 15:43

林鄭月娥央企

特首林鄭月娥密會央企高層,消息指中央要求他們加強控制港企,甚至要擁有決策權。經濟學者關焯照認為,若中央真的打算藉央企控制香港,一定會嚇到外資「走夾唔唞」,變相令香港內地化,國際金融中心地位勢再難保存。
「你睇國泰、港鐵就知,就算港交所合併倫交所,都會被睇成政治收購。國企如果來直接買公司控制香港,只會適得其反,外資一定走夾唔唞,制度會受好大影響。」關焯照認為,中央一直想擁有香港的壟斷行業,例如電力、煤氣,但本地傳統大商家隨非撤資,否則不會輕易放棄控制權,讓國企入主,「如果真係畀佢買,即是傳統家族離開香港,連投資好耐的商人都放棄香港,反而會係一個好差的訊息。」
2003年50萬人上街後,中央放寬香港工商和專業服務進入內地巿場,同時開放自由行來港,現時央企或大舉來港投資,關焯照相信是中央政府相類似的穩定大局措施。不過,他認為方向未必應該是來港控制企業,因會嚇怕外資,方向反而應是國企來港成立新公司,並跟港企合作,帶來新投資及職位,以穩定外資信心,「反送中令香港經濟好傷,傷在人哋覺得香港已經變咗質,變成內地城市,擔心國際金融中心地位仲保唔保得住。如果國企只係來增加投資,尋找合作機會,都可以穩一下民心。」
熟悉內地國情的資深投資者林一鳴則質疑,央企救港計劃成效不會顯著,「政治方面國企係好聽中央話,但經濟投資層面上,好多時一般般啫。」除了金融及地產,國企對投資香港一向缺乏興趣,加上近期國內經濟差,國企資金十分緊拙,到底可調動多少資金來港維穩,實在令人存疑。
「中國政府講就一套,但一直最緊張係國家資產流失,對國有資金流出境外非常關注,今次會唔會因為政治維穩,而大開走資水喉,我認為機會就細啲。」林一鳴認為國企高層現時可能會表態支持,但到真正落實時,可能又會走數,「我覺得唔會有咩效果,反而會加大矛盾,香港年輕人會覺得越多內地企業,會搶咗香港資源,而且對五大訴求同示威又無緩解作用。」
---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情: https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書