錢小豪同前妻郭秀雲所生嘅仔龐景峰（Andrew）進軍韓國樂壇，上月啱啱踏入25歲嘅佢，噚晚11點幾揸住屋企人嘅凌志靚車，一拖二現身銅鑼灣羅素街，做柴可夫嘅Andrew沿路駛去圓方，不過睇佢嘅駕車技術就似新牌仔，似乎唔係揸得好穩定又唔熟路，出隧道上圓方時違例cut實線行捷徑，到達停車場後泊低車行上戲院。

一拖二嘅Andrew十分風騷，同行嘅兩個女仔一高一矮，但衣着外形如出一轍，兩個都係長直頭髮，齊齊着背心短裙露bra帶，Andrew似乎同着黑裙嘅身材嬌小女仔較投契，黑裙女坐喺司機位隔籬，落車後又行喺Andrew身邊，原來佢哋約咗另一pair男女睇新戲《沒女神探》，入場前Andrew去買爆谷同飲品，黑裙女仲幫佢攞住部手機保管，Andrew買完嘢食後先畀番部手機佢。

直至凌晨1點8散場之後，Andrew再一拖二揸車去尖沙嘴寶勒巷，泊低架車去買煎釀三寶同臭豆腐醫肚，之後三人上番車，直駛去中環愛都大廈繼續下場。